Монгол улсын цагдаагийн ерөнхий газрын дарга Ч.Сандаг-Очир,

Монгол Улсын Ерөнхий прокурор, төрийн хууль цаазын

тэргүүн зөвлөх М.Алтанхуяг танаа

Батлан даалтанд гаргуулах тухай

Анод банк Монгол улсын хөгжилд үнэтэй хувь нэмрээ оруулж, Топ 4 банкны нэг болон ард түмний хайр хүндэтгэлийг хүлээж байсан цаг саяхан билээ.

2008.12.10-ны өдөр Анод банкинд онц дэглэм тогтоож хуулийн байгууллагаас банкны 3 захирлыг цагдан хорьсон тэр үе бол Анод банктай ажил, амьдралаа холбосон 500 гаруй Анодчууд бидэнд тохиолдсон хүнд үе байсан юм.

Биднийг Анод гэдэг үнэт брендийн нэг хэсэг болох завшаан олгож, ажиллах урам зориг, эрч хүч харамгүй хайрласан үүсгэн байгуулагч болон захирлуудын маань амь нас, эрүүл мэнд хутганы ирэн дээр ирээд байгаа тул Анодчууд бид батлан даалтанд гаргахын төлөө зориг зүрх нэгдэн өөрсдийн дуу хойлоогоо гаргахаар нэгдсэн билээ.

Тэд бол бидний төдийгүй гэр бүл, үр хүүхдүүдэд маань хүртэл хэдийнээ танил болсон, Анод банкинд ажиллаж байгаагаараа бахархах итгэлийг бидэнд өгсөн тийм эрхэм хүмүүс, бидний амьдрал, итгэл найдвар, зүрх сэтгэл маань юм.

Тус банкинд онц дэглэм тогтоосноос хойшхи 5 сарын хугацаанд тэд ямар их үнэт зүйл бүтээснийг Анодчууд бид өдөр өнгөрөх тусам илүүтэй ихээр мэдэрч тулгарсан хүндрэл бэрхшээлийг даван туулах өдөр ирнэ хэмээн итгэл найдвар өвөрлөсөөр байгаа билээ.

Тэднийг цагдан хорихгүйгээр асуудлыг шийдэх бүрэн боломж байгаа гэж бид үзэж байна.

-Хил, гаалиар оргон зугтааж болзошгүй гэсэн тайлбар нь бодит байдалтай нийцэхгүй, тэд тийм хэмжээний ёс суртахууны доройтолд орсон хүмүүс биш, тэгж үзэх нь хил, гаалийн албыг дорд үзсэн хэрэг болно гэдгийг эрхэм төрийн түшээ та бүхэн сайн мэдэж байгаа буйзаа.

-Гадуур шалгавал хэргийг шалгах явцад саад учруулна гэсэн нь ямар ч боломжгүй.Монгол банкнаас томилогдсон БЭТ-ийн мэдэлд бүх бичиг баримт байгаа төдийгүй, санхүүтэй холбоотой бүх мэдээ, тайлан аль эрт гарч тэдгээрийн үндсэнд 2009 оны 3-р сард гаднын аудитын шалгалт орж дүн гарсан тул ямар ч бичиг баримт, асуудалд оролцож хэргийг шалгахад хүндрэл учруулах боломж байхгүй юм.

-Эрүүл мэндийн сайдын тушаал гарсан тул мэргэжлийн байгууллагын дүгнэлтийг хүндэтгэн үзэж цаашид аль болох амь насанд нь аюул учруулахгүй аргыг сонгож Н.Даваа, Д.Энхтөр, Э.Гүр-Аранз нарыг батлан даалтаар гаргаж өгнө үү.

Ажиллагсдын гарын үсгийг цуглуулсан баримтыг хавсаргав.

АНОД БАНКНЫ АЖИЛЛАГСАД 2009.05.20