УИХ-ын 2004 оны сонгуулийн дараа ХЗХ-д дампуурч байсан бол 2008 оны сонгуулийн дараа “АНОД” банк дампуурч, тус банкны гурван захирлыг “Ганцхудаг”-т саатуулаад байгаа билээ. Тэгвэл өчигдөр тус банкны 30 гаруй ажилтан хэвлэлийнхэнд хандав.

Тэд “Д.Энхтөр болон манай гурван захирал ямар ч гэмт хэрэг хийгээгүй байхад УМБГ-аас барьж хориод зургаан сар болж байна. Гэтэл сүүлийн гурван сард нь нэг ч удаа байцаалт аваагүй учир Д.Энхтөр захирал үүнийг эсэргүүцэж, өлсгөлөн зарлаад долоо хонолоо. Одоо түүний биеийн байдал маш хүнд байна.

Олон сар чийгтэй байшинд байснаас бөөр, нуруугаар нь их өвддөг, дээр нь хуурай өлсгөлөн зарласнаас таталт хүртэл өгч эхэлсэн тухай мэдээлэл бидэнд бий. Тиймээс бид Д.Энхтөр захирлыг батлан даалтад гаргахыг ЦЕГ, УМБГ-аас хүсч байна” гэцгээж байв.

Ингээд “АНОД” банкны маркетингийн албаны захирал асан М.Мөнх-Очироос цөөн асуултад хариулт авлаа.

-Төв банк, “АНОД”-ыг хүнд байдалд орсон гэж олон нийтэд мэдэгдсэнээс харилцагчид хадгаламжнаасаа богино хугацаанд мөнгөө татсан нь дампуурах гол шалтгаан болсон гэж ярих боллоо?

-Өнгөрсөн оны сүүлээр эхэлсэн дэлхийн санхүүгийн хямрал манай оронд мэдрэгдэж эхлэх үед улс төр, эдийн засгийн шалтгаанаар Монголбанкны зүгээс явуулсан удаа дараагийн хариуцлагагүй мэдэгдлээс болж, “АНОД” банк найдваргүй юм байна гэдэг ойлголтыг нийгэмд төрүүлсэн. Гэтэл 2009 он гарсан даруй иргэд, харилцагчид 12 дугаар сарын 10 гэхэд 90 гаруй тэрбум төгрөгийг хадгаламжнаасаа татаж эхэлсэн. Энэ нь банкны төлбөр, түргэн гүйцэтгэх чадварт мэдэгдэхүйц нөлөө үзүүлсэн.

-Засгийн газраас орж ирэх байсан 40 тэрбум төгрөгийн асуудал байдаг. Энэ мөнгийг Монголбанк саатуулсан гэх яриа ч байдаг?

-Тухайн үед Засгийн газар “АНОД” банкинд замын сангийн санхүүжилтэд олгохоор байсан 40 тэрбум төгрөгийг шилжүүлж өгөх ёстой байсныг Монголбанкны удирдлагууд зохион байгуулалттайгаар зориуд саатуулсан. Энэ нь “Анод” банкийг хадгаламж эзэмшигчдийнхээ мөнгийг түргэн гүйцэтгэх чадварт нь муугаар нөлөөлсөн.
Нөгөө талаар “АНОД” банк харилцагчдын мөнгийг өгч чадахгүй болсонд банкны удирдлагууд, буруутай мэтээр иргэдэд ойлгуулсан. Монголбанкны энэ хариуцлагагүй байдлаас болж манай удирдлагуудад эрүүгийн хэрэг үүсгэх үндсэн нөхцөл болсон. Тэр үед “АНОД” банкинд зузаатгал хийсэн бол өнөөдөр ийм байдалд орохгүй байсан гэдгийг л би баттай хэлж чадна.

-Тэгэхээр “АНОД” банкийг зориуд дампууруулсан гэсэн үг үү?

-Зохион байгуулалттайгаар хийсэн нэлээд дээрээс хаясан чулуу гэдгийг өнөөдөр олон хүн хэлдэг. Яг энэ асуудлаар тухайн үед хэд, хэдэн эдийн засагчид байр сууриа хэвлэл мэдээллийн хэрэгслээр илэрхийлж байсан.

- Одоо “АНОД” банк хэдэн ажилтантай байна. Монголбанкнаас ажилчдынхаа тоог цөөл гэсэн шаардлага тавьсан гэж сонсч байсан?

-”АНОД” банкны толгой одоо Монголбанкинд шилжсэн. Тэд 550 гаруй ажилтантай томоохон байгууллага байсныг цомхотгож, 250 ажилтантай болгосон. Уг нь “Анод” хувийн өмч гэтэл төр, эрх баригчдын зүгээс бүдүүлгээр халдаж, тус банкийг үүсгэн байгуулсан эздийг шалгаж байна гэх нэрээр удаан хугацаагаар хорьж хэлмэгдүүлж байна.

-УМБГ-аас Д.Энхтөр захирлыг албан тушаалаа урвуулан ашигласан. Дээр нь хуурамч баримт бүрдүүлж, их хэмжээний мөнгө завшсан гэх үндэслэлээр эрүүгийн хэрэг үүсгээд байгаа. Танай захирал үнэхээр мөнгө завшсан юм уу?

-Банк санхүүгийн байгууллага гэдэг бол 5000 төгрөгийг гүйлгээнд гаргасан ч бичиг баримт шаарддаг. Энэ утгаараа нэг төгрөг авсан ч баримтаар гараад л ирдэг. Хамгийн их нотлох баримт үлддэг байгууллага шүү дээ. Д.Энхтөр захирлыг хувьдаа мөнгө завшсан гэдэгт манай байгууллагын нэг ч хүн үнэмшихгүй. Хэрвээ үнэхээр л мөнгө аваад завшсан бол зургаан сар хоригдох хугацаанд нь ямар нэг сэжүүр олдох ёстой биз дээ. Гэтэл тэр мөрдөн байцаагч нар чинь өнөөдрийг хүртэл ямар ч нотлох баримт олоогүй байж хориод л байна.

-Энэ хэрэгт холбогдуулж танай байгууллагын ажилчдаас байцаалт авсан уу?

-Нийт 30-40 хүнээс гэрчийн мэдүүлэг болон байцаалт авсан.