“Иргэний хөдөлгөөний нам”-ын тэргүүн, “Анод” банкны гүйцэтгэх захирал Н.Давааг Олон улсын хүний эрхийг хамгаалах өдөр буюу өнгөрөгч 12 дугаар сарын 10-ны өдөр баривчилжээ. Үүнээс хойш таван сар болж буй аж. Тиймээс тус намын Ерөнхий нарийн бичгийн дарга Э.Батбаяр, Нарийн бичгийн дарга С.Амарсайхан нар өчигдөр хэвлэлийнхэнд мэдээлэл хийв.
Тэд “ИХ” намын дарга Н.Давааг суллахыг шаардсан. Учир нь шүүх, цагдаагийнхан хэн нэгэн албан тушаалтны захиалгаар түүнийг гэмт хэрэгтэн болгож буйд гомдолтой байгаа гэдгээ илэрхийлсэн юм. Түүнчлэн “Хохирогчгүй байхад гэмт хэрэгтэн хэмээн үзэж, олон нийтийн мэдээллийн хэрэгслээр албаны хүмүүс мэдээлэл хийж байгааг буруушааж байна. Түүний нэг нь Монголбанкны ерөнхийлөгч Л.Пүрэвдорж” гэж хурал зохион байгуулагчид хэлж байлаа.
Мөн “Улсын мөрдөн байцаах газрын Эдийн засгийн гэмт хэрэг мөрдөх хэлтсийн байцаагч сонгуулийн дараа батлан даалтад гаргана” хэмээн мэдэгдсэнийг сануулж, эцэст нь энэ хэрэг захиалгат гэдгийг онцолсон юм.