Анод банкны үүсгэн байгуулагчид, захирлууд гээд гурван хүн Ганц худагын урьдчилан хоригдох төвд хоригдоод зургаан сар өнгөрчээ. Энэ хугацаанд мөрдөн байцаалтын ажил хэт удааширч байгаагаас тэдний зарим нь шоронд өлсгөлөн зарлаад 10 гаруй хонож байна. Харин өчигдөр тус банкны гүйцэтгэх захирал Д.Энхтөрийн бие муудан ухаан алдсан тухай гэр бүлийнхэн нь мэдээллээ. Одоогоор тэднийг батлан даалтад гаргах эсэх нь тодорхойгүй байна.

Ямартай ч тэдний гэр бүлийнхэн УИХ-ын гишүүн, Хүний эрхийн дэд хорооны дарга Э.Бат-Үүлд хандан хүсэлт гаргажээ.

Энэхүү хүсэлтэд:
Анод банкыг үүсгэн байгуулагчид болох Д.Энхтөр, Н.Даваа, Э.Гүр-Аранз нар “Ганц худаг”-ийн урьдчилан хоригдох төвд хоригдоод 6 сар шахам хугацаа өнгөрлөө. Энэ хугацаанд Цагдаагын байгууллагын зүгээс дараах байдлаар эдгээр хүмүүсийн нэр хүнд, хүний эрхэд халдаж байна.

-Дээрх хүмүүсийг Гэмт хэрэгт холбогдолтой гэдэг нь шүүхээр эцэслэн тогтоогоогүй байхад Цагдаагийн байгууллагын зүгээс Ганц худагт хоригдсон өдрийн маргаашнаас олон нийтийн мэдээллийн хэрэгслээр байнга мэдээлж нэр хүндэд нь халдаж байна.

-Дээрх хүмүүс Ганц худагт хоригдсоноос хойш 6 сар шахам өнгөрч байхад байцаалт бараг авсангүй. Мөрдөн байцаагчдын зүгээс байцаалт авахдаа зөвхөн эрүүл мэнд, биеийн байдал зэргийг асуух төдийхнөөр хязгаарлагдаж байна. Д.Энхтөрөөс гэхэд сүүлийн 100 хоногт нэг ч удаа байцаалт авсангүй.

-Мөн Д.Энхтөрийн хүүхдийн нэр дээс байсан хадгаламжийн дансыг хаасан, өвлийн хүйтэн цагаар ар гэрийн хүмүүсийг нь байрнаас хөөж гаргасан зэрэг зохимжгүй үйлдэл хийж байна. Мөн Монголбанкнаас томилогдсон Бүрэн эрхт төлөөлөгчийн эхнэр нь Д.Энхтөрийн эхнэр Б.Ариунжаргалын автомашиныг хувийн хэрэгцээндээ ашиглаж байгаа нь туйлын зохимжгүй үйлдэл юм.

-Цагдаа, хуулийн байгууллагаас уг хэргийг Монголбанкны гомдлын дагуу шалгаж байгаа гэсэн тайлбар өгч байгаа. Гэвч Д.Энхтөр, Н.Даваа, Э.Гүр-Аранз нарыг 2008 оны 12 сарын 10-ны өдөр баривчилсан боловч Монголбанкнаас УМБГ-т очсон бичиг 2008 оны 12 сарын 13-нд очсон байна.