Гомдол, Шаардлага гаргах нь:

ШШГЕГ-ын харьяа Ганц худагийн урьдчилан хорих төвд 2008 оны 12 сарын 10-ны өдрөөс өнөөдрийг хүртэл саатуулагдан хоригдож буй Анод банкны Гүйцэтгэх захирал Д.Энхтөр 2009 оны 5 сарын 5-ны өдрөөс эхлэн өлсгөлөн зарлаад 9 дахь өдрөө хүрлээ.

Өнөөдөр манай өмгөөлөгч н.Энхтуяа шүүгчтэй уулзахад мөрдөн байцаагч Доржсүрэн миний нөхөр Д.Энхтөрийг өлсгөлөнгөө зогсоосон гэж хэлсэн гэсэн. Ийм учраас 14:00 цагт миний бие өмгөөлөгч Энхтуяагийн хамт байдлыг тодруулах болон нөхрийнхөө биеийн байдалтай танилцахаар Ганц худагт очиж, тус хорих төвийн дарга, хурандаа н.Өлзиймөнх болон тус газрын эмнэлэгийн ерөнхий эмч, дэд хурандаа н.Дамдинсүрэн нартай уулзсан. Тэгэхэд миний нөхөр өлсгөлөнгөө зогсоогоогүй байсан ба тус хорих газрын харгалзагч Өсөхбаяр нь миний нөхрийн биеийн байдал асар их сульдаж, ямар ч эсэргүүцэл үзүүлэх чадваргүй байхад нь биед нь халдаж, өшиглөж унагаасан, чирж аваачин, сувилагч Болормаа хүчээр судсаар нь шингэн зүйл тарьсан гэж байна. Миний нөхрийн биеийн байдал маш муу хөл дээрээ тогтож чадахгүй, хүнээр түшүүлж явж байсан. Цусны даралт нь 50, 40 байсан гэж жижүүрийн эмч нь мэдээлсэн. Өлзиймөнх дарга Дамдинсүрэн ерөнхий эмчид өлсгөлөн зогсоогүй байгаа болон биеийн байдлыг байцаагч Доржсүрэнд албан ёсоор мэдэгд гэж тушаасан. Үүний дагуу 18 цаг 15 минутанд тус эмнэлгийн ерөнхий эмч Дамдинсүрэн, мөрдөн байцаагч Доржсүрэн рүү утасдаж, “өлсгөлөнгөө зогсоогоогүй, энэ хүний асуудлыг шийдэж өгөөч, энэ хүн энд албадан эмчилгээ хийлгэх байна. Тийм учраас та энэ хүнийг гаргаж, гадуур эмчилгээнд оруулах арга хэмжээ авахаа та хариуц, та мэдэх ёстой, бид таны нэр дээр албан тоот явуулъя” гэж хэлсэн. Энэ яриаг хийх үед миний бие болон Дамдинсүрэн эмч, өмгөөлөгч Энхтуяа, тус хорих төвийн даргын туслах нар байсан болно.

Үүгээр би байцаагч Доржсүрэнгийн өлсгөлөн зогссон гэсэн худал мэдээлэл өгсөнд гомдолтой ба өлсгөлөн зогсоогүй гэдгийг албан ёсоор мэдэгдэж байгааг анхааралдаа авч, миний нөхрийн бие болон хүний эрхэнд нь халдах, эрүүл мэнд, амь насанд аюултай байдал учирахыг үгүйсгэхгүй бөгөөд хэрэв эрүүл мэнд, амь насанд аюул учирвал хэн нөхрийн минь амь насыг хариуцах вэ???

Иймд би гомдолтой тул яаралтай миний нөхрийн асуудлаар яаралтай хуралдаж шийдвэр гаргахыг шаардаж байна.

Б.АРИУНЖАРГАЛ

Д.ЭНХТӨРИЙН ЭХНЭР