"Анод" банкны гүйцэтгэх захирал Д.Энхтөр нойтон өлсгөлөн зарлаад 13 хонож байна. Тэрбээр шударга бус үйлдлийн золиос болж, хэн нэгэн муу санаатны явуулгаар хэлмэгдэж байна хэмээн эрх баригчдыг ямар нэгэн шийдвэр гаргатал тэмцлээ үргэлжлүүлнэ гэж байсан. Гэвч сүүлийн үед зарим хэвлэлээр түүнийг "Өлсгөлөн зарлаагүй. Зүгээр л улс төрийн шоу хийж байна" гэсэн утгатай зүйл гарах боллоо.

Ямартай ч өөрийнхөө өлсгөлөн зарлах болсон тухай илэрхийлсэн захиаг эхнэрээрээ дамжуулан ард түмэнд хүргэж байсан түүнийг шоу хийж байсан гэхэд гайхмаар.

Тиймээс Д. Энхтөрийг өлсгөлөн зарласан нь үнэн эсэх талаар Шүүхийн шийдвэр гүйцэтгэх ерөнхий газрын харьяа Ганц худаг дахь урьдчилан хорих 461 дүгээр ангийн дарга, хурандаа Н.Өлзиймөнхөөс тодрууллаа.

-"Анод" банкны гүйцэтгэх захирал Д.Энхтөр өлсгөлөн зарласан нь үнэн үү?
-Тийм ээ. Энэ сарын 5-ны өдрөөс өлсгөлөн зарласан.

-Энэ хугацаанд өлсгөлөнгөө зогсоосон тал бий юу. Та бүхэн цаг тухайд нь мэдээлж байсан уу?
-Одоогоор өлсгөлөнгөө зогсоогоогүй байна. Анх эхлэхэд нь мөрдөн байцаагч зэрэг холбогдох хүмүүст нь цаг алдалгүй мэдээлж байсан.

Д.Энхтөрийн өлсгөлөн зарлаж байгааг Ганц худаг дахь урьдчилан хорих төвийн дарга нь баталлаа. Тиймээс шүүний биеийн байдал ямар байгаа шалаар эхнэрийнх нь эгч Б.Баярмаагаас тодруулсан юм.

-Д.Энхтөр өлсгөлөн зарлаад багагүй хугацаа өнгөрлөө. Биеийн байдал нь ямар байгаа вэ?
-Үнэхээр хүнд байна. Өлсгөлөн зарлаад 13 хонож байхад эрх баригчид ямар нэгэн шийдвэрийг одоо болтол гаргаагүй. Дүү минь амиа алдаж мэдэх нь.

-Түүнийг эмнэлэгт хэвтэж байгаа гэж дуулсан. Үгүй юу?
-Одоо болтол эмнэлэгт хэвтүүлээгүй. Бронхит нь хүндэрч астам болсон. Дээр нь саяхан эмчийн үзлэгт ороход "Бөөрний дутагдалд орж мэдэх нь. Цус нь маш өтгөрсөн байна. Хурдан арга хэмжээ авахгүй бол амь насанд нь аюултай" гэж хэлсэн. Юу ч идэхгүй болохоор дөрвөн мөч нь эцэж сульдсан, маш туранхай, тураалын гуравдугаар үед ороод байна.

Б.Өлзийдэлгэр