Эрүүгийн хуулийн 148 дугаар зүйлийн 148.4, 150, 156 дугаар зүйлийн 156.3-т заасан бусдын эд хөрөнгийг залилан мэхэлж авсан, завшиж үрэгдүүлсэн, банкны тухай хууль зөрчсөн гэсэн үндэслэлээр “Анод” банкны гүйцэтгэх захирал, Д.Энхтөр, ТУЗ-ийн дарга Э.Гүр-Аранз, ТУЗ-ийн гишүүн Н.Даваа нарыг таван сарын турш саатуулан шалгаж байгаа. Эрүү үүсгэн шалгаж байгаа хэргийн зүйлчлэлийг сэжигтнүүд хүлээн зөвшөөрөхгүй байгаагаас гадна батлан даалтад гаргахыг хоригдсон цагаас нь эхлэн шаардсан аж. Гэсэн ч “Мөрдөн байцаалтаас оргон зайлж болзошгүй, батлан даалтад гаргасан тохиолдолд хэргийн бодит байдалд гаднаас нөлөөлөх магадлалтай. Тиймээс цагдан хорих шаардлагатай” гэсэн хариу өгдөг аж. Харин банкны ажилтнууд нь дээрх тайлбарыг эсэргүүцэж байгаагаа мэдэгдсэн. Хэвлэлийн хурал зарласан ажилтнуудын дунд Д.Энхтөрийг банк байгуулсан цагаас нь эхлэн хамтран ажилласан хүн ч байсан юм. “Д.Энхтөр захирал болон бусад захирлууд маань бүх л талаараа залууст үлгэр дууриал болох сайн хүмүүс. Тодорхой хугацаанд хамтарч ажиллаж байсны хувьд бид үүнийг баталж чадна. Гэтэл цагдаагийн байгуул­лагаас захирлуудыг маань онц хүнд гэмт хэрэгтнүүд мэтээр ярьж, олон нийтэд ташаа ойлголт өгсөн. Д.Энхтөр захирлын биеийн байдал маш хүнд байгаа. Тиймээс ар гэрийнхэн болон хамт олных нь батлан даалтад гаргаж өгнө үү гэж цагдаагийн удирдлагуудаас хүсч байна” хэмээн тэд ярьсан юм.

Өөрсдөд нь үүсгэсэн эрүү­гийн хэргийн хуулийн зүйл заал­тыг хүлээн зөвшөөрөхгүйгээ мэдэгдэхийн зэрэгцээ батлан даалтад гаргахгүй байгааг эсэр­гүүцэн Д.Энхтөр өлсгөлөн зар­ла­сан. Гэсэн ч удаан хуга­цаа­гаар хоригдсон учир өлсгөлөн зарлахад биеийн байдал нь дийлэхгүй болоод байгаа тухай түүний ойр дотнынхон ярив. Д.Энхтөр өлсгөлөн зарлах тухай­гаа энэ сарын 5-нд холбогдох хүмүүст нь мэдэгдсэн аж. Гэтэл түүний ар гэрийнхэн болон өмгөөлөгч нар нь гурав хоногийн дараа эргэлтээр очихдоо энэ тухай мэджээ.