Дэлхий нийтийг хамарсан эдийн засгийн хямралын тухай яриа гарах тэр үед манай улсын томоохон банкны нэг “Анод”-ын тухай таагүй мэдээлэл чих дэлсч эхэлсэн. Тус банкны гүйцэтгэх захирал Д.Энхтөр, ТУЗ-ийн дарга асан Э.Гүр-Аранз, Н.Даваа нарыг өнгөрсөн оны 12 дугаар сарын 11-нд Ганцхудагт саатуулсан. Саатуулсан шалтгаан нь хадгаламж эзэмшигчдийн их хэмжээний мөнгийг эрх мэдэл албан тушаалаа урвуулан хууль бусаар гарган банкны үйл ажиллагаанд сөрөг нөлөө үзүүлсэн гэж хуулийн тайлбарлаж байсан. Энэ хэргийг Мөрдөн байцаах газрын Эдийн засгийн гэмт хэрэг мөрдөх хэлтэс болон Эрүүгийн цагдаагийн газрын Эдийн засгийн гэмт хэрэг мөрдөх хэлтсийн хамтарсан ажлын хэсэг шалгаж эхэлсэн юм. Өнгөрсөн хугацаанд “Хилс хэрэгт гүтгэж байна” хэмээн удаа дараа мэдэгдэж байсан Д.Энхтөр өлсгөлөн зарласан ч эрүүл мэндийн байдлаас шалтгаалж I эмнэлэгт хэвтүүлсэн.ТУЗ-ийн дарга Н.Даваа өлсгөлөн зарлах гэсэн боловч зүрхний үйл ажиллагаа нь хэвийн бус учир эмч нар зөвшөөрөөгүй юм. Эрүүл мэнд нь муудсан учир III эмнэлэгт хэвтүүлж байгаад өөр эмнэлэгт нарийн шинжилгээ хийлгэнэ хэмээгээд Ганцхудаг руу авчирсанд гэр бүлийнх нь эсэргүүцлээ илэрхийлж байлаа. Хагас жил орчим батлан даалтад гаргахаар хөөцөлдөн аргаа барж байсан өмгөөлөгч, тэдний ар гэрийнхний хүсэлт биеллээ.