Он солигдох зааг дээр “Анод”-ын гэх хэрэг дэгдэж, захирал, эздийг нь хорин саатуулахын сацуу “Анод”-ынхан маш муу хүмүүс болох тухай, идсэн завшсаныг нь гайхан шагшрах зохион байгуулалттай мэдээлэл, сурталчилгааны ажил өрнөсөн билээ.Нэг хэсэг намжиж, сонгууль энэ тэр гэж бужигнасны дараа энэхүү “аймшгийн кино” дахин амилж, цагдаа прокурор, Монгол банкныхан өдөр алгасалгүй ярилцлага өгч, асар том хэрэг илрүүлснээ шагшин магтаж эхэллээ. Үнэндээ сүүлийн арав гаруй жил аливаа “шударга тэмцэл” гээчийн ард улс төр, бизнесийн бүлэглэлийн сонирхол нуугдаж байдгийг хэдүйн амьдрал нотолсон. Тэгвэл “Анод”-ын хэрэг гэгч хөшигний ард юу нуугдаж байна вэ? Өнөөг хүртэл нэг ч харилцагч, нэг ч хадгаламж эзэмшигч мөнгөө нэхэж, суулт, өлсгөлөн зарлаагүй байхад цагдаагийн байгууллага эл асуудлыг олон нийтэд дэвэргэн хүргээд байгаагийн цаад учир юу вэ?
Чухамдаа бол “Анод”-ын хэрэг гэгчийн цаана “Монголд үйлдвэрлэсэн” олигархуудын дайн, хувийн өмчийг үнэгүйдүүлж дээрэмдэх , цаашилбал санхүүгийн зах зээлд ноёрхохыг хүсч буй олигополи бүлэглэлүүдийн сонирхол байгаа нь хэнд ч тодорхой юм. Монгол хүн нэгнийгээ үздэггүй тамын тогооны үлгэр уг санаархлыг хэрэгжүүлэх бэлээхэн хөрс нь болжээ. Учир нь “Анод “ нь зөвхөн Монголчуудын хөрөнгөөр боссон, гадаадын сохор цент ч нэмэрлээгүй цорын ганц арилжааны банк учраас ноён Д.Энхтөр, Н.Даваа, Э.Гүр-Аранзан нарт атаархагчид дэндүү олон, тэднийг дээрэлхэн, дарамтлахад ч дөхүү аж. Жишээлбэл: “Хаан” банк хямралд нэрвэгдлээ гэхэд манай хууль хяналтын байгууллага, Монгол банкныхан ноён Питер Морроуг шууд шоронд хорьж зүрхлэх үү? Эсвэл ноён Громовыг баривчлах уу? Хариултыг нь та надаар хэлүүлэлтгүй мэдэж байгаа.
Нөгөө талаар “чоно борооноор” гэгчээр зарим нэг этгээдүүдэд “Анод” банкны томоохон зээлдэгч нарт “луу унжиж”, олон сая долларын зээлээ үнэгүйдүүлэх таатай боломж үүсээд байгаа юм биш үү? Ер нь банк дампуурах нь хэнд ашигтай байдаг вэ? Ердөө л томоохон зээлдэгчдэд .Эдүгээ арван жилийн өмнө “Ард” банк, “ХОТШ”, Сэргээн босголтын банкийг дампууруулахгүй гэж хувийн “Голомт” банкинд нийлүүлэх гэж байсан түүх хуучраагүй. Найр наадмын улирал эхэлж байгаагаар далимдуулан энэхүү дээрмийн операцийн хөрсийг бэлдэж байж ч тун болзошгүй байна. Мөн “Анод”-ын гурван захирлыг барьж хорих шаардлага байсан уу үгүй юу гэдэг нь ч эргэлзээтэй асуудал. Чингэснээр Монголын бизнесийн ертөнцийг дэндүү сайн мэддэг, олигархуудын хэлхээ холбоо, алсын сонирхлыг гадарлаж байсан банкируудын амыг үдэж, зоригийг нь мохоож, үндэсний бизнесменүүдийг нэг ёсны “журамлах” үйл ажиллагаа явагдаж болзошгүй юм. Юутай ч “Анод”-ын хувь заяаг олигархиуд өөрсдөдөө ашигтайгаар шийдчихэж буй бололтой.
Л.Насанжаргал
Мэдээллийн эх сурвалж: Sonin.mn