УЛСЫН ЕРӨНХИЙ ПРОКУРОР

М. АЛТАНХУЯГ ТАНАА

2009 оны 6 сарын 03 Гомдол гаргах нь:

Миний бие Дашдорж овогтой Энхтөр нь 1999-2005 хүртэл Анод банкны гүйцэтгэх захиралаар, 2005 оноос 2008 оны 4 сар хүртэл ТУЗ-н даргаар, 2008 оны 4 сараас 2008 оны 11 сарын 20 хүртэл ТУЗ-н гишүүнээр, 2008 оны 11 сарын 20 нд ТУЗ-н шийдвэрээр банкны Гүйцэтгэх захирлаар 20 гаруй хоногийн хугацаанд ажиллаж байгаад 2008 оны 12 сарын 10-ны өдөр хэн нэгэн хуулийн этгээд гомдол гаргасан мэдэгдэл ирээгүй байхад миний болон бидний нөхдийг хүний эрх болон цагдан хорих хууль тогтоомжыг ноцтой зөрчиж хүний эрхийн өдөр цагдан хорьсон билээ. Гэтэл 3 хоногийн дараа буюу 2008 оны 12 дүгээр сар 13-ны өдөр нөхөж хийсэн Монгол банкны хүсэлтийн дагуу УМБГ-ын ЭЗГХТ 5-р хэлтэст ЭХТА-ийн 156.3, 148.4, 150-р зүйлчлэлээр заавал цагдан хорьж шалгах хэрэгтэй гэсэн үндэслэлээр хорьсоноос хойш 6 сар гаруй өнгөрч байна.

Энэхүү хугацаа өнгөрөхөд мөрдөн байцаалтын үйл ажиллагаанд ямар нэгэн саад учруулалгүй, удаан хугаацаанд үндэслэлгүйгээр хэлмэгдэн хоригдож байгаагаа эсэргүүцэн өлсгөлөн зарлан батлан даалтанд гаргах хүсэлтээ удаа дараа өмгөөлөгчөөрөө дамжуулан өгсөн билээ.

Гэтэл дээрхи гэмт хэрэгт Монгол банкны хүсэлтээр мөрдөн байцаалтын үйл ажиллгааа дуусаагүй, гэм буруутай нь шүүхээр тогтоогдоогүй байхад мөрдөн байцаах болон улсын ерөнхий прокурорын байгууллага нь “Хүний эрхийн түгээмэл тунхаглал”-ын 8-12, 28, “Иргэний болон улс төрийн эрхийн тухай олон улсын пакт”-ын 6, 17, 26 болон Монгол улсын “Үндсэн хууль”, Эрүүгийн болон Эрүүгийн байцаан шийтгэх хуулийг ноцтой зөрчиж, миний гэр бүлийнхэн болон миний бие сэтгэл санаа, нэр төрийг гутаан доромжилон, банкны дүрмийн дагуу бусдад олгосон зээлийг хувьдаа завьшин шамшигдуулсан гэм буруутан мэтээр хэвлэл мэдээллийн хэрэгсэлээр мэдээлсэнд гүнээ харамсаж, гомдолтой байна.

Иймд улсын мөрдөн байцаах газарт болон улсын ерөнхий прокурорын байгууллагын хариуцлагагүй, хэт дур зоргоороо хууль зөрчсөн ЭБШХ-р олгогдоогүй эрхийг эдлэдэг ажилтануудад холбогдох журмын дагуу арга хэмжээ авч миний гомдолыг барагдуулахыг шаардан даруй хариу мэдэгдэхийг хүсье.

Гомдол гаргасан Д.Энхтөр