Монголбанк эртнээс “Анод”-ыг банкны системийн нөхөөсөнд ашиглах төлөвлөгөө боловсруулж, жүжиг найруулсан байж болзошгүй болоод байна. Дээр өгүүлсэнчлэн “Анод” банк үнэгүй байх тусмаа л Монголбанк ч юм уу, хэн нэгэнд нь ашигтай. Хоёр гуравхан өдрийн өмнөөс Монголбанк “Анод”-ын хувьцааг 100 хувь өөрийн мэдэлд шилжүүлэх гэж буй талаар “шум” нисэх болов. Олон нийтийн хувьцаат компанийг Монголбанк яагаад 100 хувь өөрийн мэдэлд авахаар болов. “Анод”-ын 35 хувийг эзэмшдэг 1200 гаруй хувьцаа эзэмшигч нар яах бол. УМБГ-аас “Анод”-ын 1200 гаруй хувьцаа эзэмшигчийг хохирогчоор дуудан байцаалт авч байгаа нь тодорхой болж байх шиг. Уг нь санхүү, үнэт цаасны зах зээл дээр үнэт цаас худалдан авагч, хувьцаа эзэмшигч нь цэвэр эрсдэлээ даадаг. Ийм атал УМБГ-ынхан яагаад хувьцаа эзэмшигчдийг хохирогчоор дуудаж байгааг ойлгохгүй байна гэдгээ Санхүүгийн зохицуулах хорооныхон хэлж байсан. Өөрөөр хэлбэл хувьцаа эзэмшигч хувьцаанаас ашиг олбол аз, хохирол амсвал хохь нь болдог хуультай. Үүнийг Монголбанкныхан мэдэхгүй биш мэдэхийн дээдээр мэдэж байгаа ч дүлий дүмбэ царайлаад л өнгөрч байна. Чихээ бөглөснийх нь ч тус гарч “Анод”-ын 1200 гаруй хувьцаа эзэмшигчийг хохирогч болгоод эрүүгийн хуулиар тэдний хохирлыг Д.Энхтөр, Н.Даваа, Э.Гүр-Аранз нараар төлүүлэх болно. Ингэснээр “Анод” банк 100 хувь Монголбанкны мэдэлд очиж байгаа юм. Тэд одоо яасан ч болно. Ганц саад болж байсан 35 хувийн хувьцаа эзэмшигч 1200 гаруй хүнийг хөөрхөн аргалчихсан юм чинь. Хэрэв 1200 гаруй хувьцаа эзэмшигч нэгдээд өөрсдийнхөө эрх ашгийг хамгаалахаар тэмцэж эхэлбэл харин байдал эсрэгээрээ эргэж магадгүй юм.
Харин “Анод”-ыг өөрийнхөө мэдэлд авсан Монголбанк цаашид яах бол. Энэ үеэс Монголбанкны эрх мэдэл жулдаж эхлэх бололтой. Учир нь Монголбанк улс төр, бизнесийн бүлэглэлүүдэд нэг том бялууг л бэлдэж өгч байгаа хэрэг. Үүрэг нь ч тийм л байсан байх. Харин тэр том бялууг нөгөө гайхал олигархиуд, төрөөс төрсөн тэрбумтнууд нь хувааж идэх ажилдаа орно. Үүнд мэдээж ямар нэгэн банкны хувьцаа эзэмшдэг хүмүүс багтах нь ойлгомжтой.
Өнөөдөр Монголын банкны систем бүрэн нурчихсан гээд хэлчихэд хэтрүүлэг болохгүй. Улс төрчдийн элдэв луйврын хүчээр л банкууд оршин тогтнож байгаа. Тэд өөрсдийнхөө хувьцаа эзэмшдэг банкуудыг авч үлдэхийн тулд “Анод”-ыг хэсэг хэсгээр нь эв найрамдалтай хувааж идэх гэж байж болох юм. Монголбанк арилжааны банкуудыг нийлүүлэн цөөлөх бодлого баримталж буйгаа тодорхой хэлсэн. Тиймээс нэгдэж нийлж байгаа банкуудад “Анод” шиг сайн суурь хэрэг болох нь гарцаагүй. Товчхондоо бол 10 гаруй жилийн өмнөх “ХОТШ”, “Ардын банк”-ны хэрэг давтагдана гэсэн үг. “ХОТШ”-ыг дампууруулж “Ардын банк” болгоод дараа нь мөн дампууруулсан түүх мартагдаагүй байна. Энэ дундаас “Голомт”, Худалдаа хөгжлийн банк томоохон бялуу хүртсэнээр өнөөдрийн оргилд хүрэх эхлэлээ тавьсан гэдэг. Үүнтэй адил санхүүгийн хямралын үед аль эрт ганхаад эхэлчихсэн жижиг банкуудыг авч үлдэхийн тулд “Анод”-ыг ашиглах нь эртний төлөвлөгөө байсан байж болох юм. Нөгөө сүрхий “Анод”-ын суурин дээр Монгол улсын хөгжлийн банк ч юм уу, эсвэл Хөрөнгө оруулалтын банк байгуулна гэж байсан нь зүгээр л хүний нүдийг хуурсан хэрэг байсан гэдэг нь тодорхой болж байгаа юм биш үү.
Эндээс Монголбанкны найруулсан жүжиг хэр үнэмшилтэй, хэрхэн хэрэгжиж байгаа нь тодхон харагдана. Харин хэний захиалгаар энэ жүжгийг найруулав гэдэгт цаг хугацаа хариулт өгөх бизээ.