Энэ асуултын хариултыг мэдэж байгаа хүн ер нь байна уу? Хэргийг шалгаж байгаа УМБГ-ын мөрдөгчид ч үүнд хариулж чадахгүй биз. Хууль журмынхаа дагуу бол Д.Энхтөр, Н.Даваа, Э.Гүр-Аранз нарыг батлан даалтад гаргаад хэргийг шалгах бүрэн боломжтой. Үүнийг тэдний өмгөөлөгчид, хуулийн байгууллагын ажилтнууд төдийгүй эдийн засагчид, улс төрчид ч хэлж байгаа юм. Тэгвэл батлан даалтад гаргах эрхийг эдэлдэг прокурорын зүгээс бас л хууль ярьж, гэмт хэргийн мөрийг баллана, оргон зугтаана гэсэн тайлбар тавьж, батлан даалтад гаргахгүй байсаар. Ерөнхийлөгчийн сонгуулийн дараа батлан даалтад гаргаж магадгүй хэмээн ар гэрийнхэн, эхнэр хүүхдийг нь нэг бус удаа горьдоогоод авсан удаатай. Хоёр тал адилхан л хууль яриад суучихаар алиных нь зөв, алиных нь буруу гэдэг сүүлдээ ойлгогдохгүйд хүрлээ. Энэ нь манай эрүүгийн хуулийн гажиг тогтолцооны нэг тод илрэл гэж зарим хуульчид ярьж байгаа нь үнэний ч ортой биз. Нөгөө талаар хэрэв прокурор, мөрдөн байцаагчид ямар нэгэн нотлох баримт олсон бол түүнийгээ олон нийтэд ил тод үзүүлээд ийм тийм нотлох баримттай учир ингэж саатуулан шалгаж байна гэвэл олны эргэлзээ тайлагдахсан. Гэтэл Прокурорын ерөнхий газраас гаргасан мэдэгдэлд ийм ийм хэрэгт сэжиглэн шалгаж байгаа учир хорьж байна гэж байгаа ч ингэж нотлох баримт олсон гэсэн өгүүлбэр бас л байхгүй байна. Хагас жил болоход ямар нэгэн нотлох баримт олоогүй байна гэдэг, нотлох баримтгүйгээр хорьсоор байна гэдэг цаанаа нэг зүйл хэлээд байгаа юм биш үү…
Хэрэв Д.Энхтөр тэргүүтнүүд батлан даалтад гараад Засгийн газар, Монголбанкныхны хийж чадахгүй байгаа (магадгүй хүсэхгүй байгаа) тэр зүйлийг хийчихвэл яах вэ гэсэн айдас үүний цаана байгаа юм биш биз. Монголбанкныхан “Анод”-ыг яах вэ гэсэн ганцхан асуултад түмэн хариулт бэлтгэчихээд л түүнийгээ сүүлийн зургаан сар тоть шиг давтаж байгааг зарим хүмүүс анзаарч байгаа байх. Ийм алдагдалтай банкинд хөрөнгө оруулах гадаадын хөрөнгө оруулагч алга, зээл төлөлт сайн биш байна гэсэн үгсийг мөн ч олон удаа давтсан даа. Тэгвэл эдгээр асуудлыг Д.Энхтөр хөнгөхөн шийдчих чадалтай аавын хүү гэж Анодын ажилтнууд нь үздэг юм билээ. Тэрбээр АНУ болон Европын зах зээлээс хэд хэдэн томоохон хөрөнгө оруулагч олж байсан ч тухайн үеийн “Анод”-ын ТУЗ-ийн бодлого Солонгос чигт байсан болохоор бүтэлгүйтэж байсан гэдэг. Энэ нь Д.Энхтөрд “Анод” банкаа эргүүлээд хөл дээр нь босгох, тэр идсэн уусан гээд байгаа 40 тэрбум төгрөгийг хөнгөхөн дарчих бүрэн боломж байгааг харуулж байгаа хэрэг гэж ажилтнууд нь тайлбарладаг юм билээ. Басхүү тэр маргаантай гээд байгаа, эргэн төлөгдөхгүй байгаа зээлийнхээ хойноос хөөцөлдөхөд бүгдийг нь биш юм гэхэд талыг нь төлүүлчих бүрэн бололцоо Д.Энхтөр захиралд бий. Хүнд юм өгсөн хүн өөрөө очоод нэхэх, хөндлөнгийн нэг хүн очоод та ийм зээлтэй юм байна өг гэж хэлэх хоёр тэнгэр газар шиг зөрүүтэй шүү гэдгийг банкны салбарынхан хэлж байгаа. Тиймээс Д.Энхтөрөөр ийм зүйл хийлгэхгүйн тулд, “Анод”-ыг хөл дээр нь босгохгүй байх сонирхлын үүднээс Д.Энхтөр тэргүүтнийг батлан даалтад гаргахгүй байж болох юм. Энэ бол банкны салбарынханд буй таамаглал. Гэхдээ нэлээд бодитой байж болох юм.

С.Болд-Эрдэнэ. bts_27@yahoo.com

Эх сурвалж: Ulaanbaatar Times