“ИТОЧУ”-Д БУЦААЖ ТӨЛӨХ ЁСТОЙ 200 САЯ АМ.ДОЛЛАРЫГ НЭГЭН БАНКНААС “АНОД”-Д ШИЛЖҮҮЛЖЭЭ

БЭТ-ҮҮДИЙН САРЫН ЗАРДАЛ 22 САЯ ХОЛ ДАВЖЭЭ

Тэдэнд зориулагдаж тус банкнаас ганцхан сард да­раахь зардлуудыг гар­гасан байна. Үүнд:

1.Цалин, С.Насанжаргал таван сая, бусад төлөө­лөгчид дөрвөн сая нийт нэг сард 21 сая төгрөг.

Доор харуулсан дүн нь гарт олгосон нь. Өөрөөр хэлбэл, татвар хасагдсан дүн

2.Утас:

а.Дотуур утас буюу эн­гийн утас

б.Гар утас

-”Мобиком”-д нийт 640 000 төгрөг шилжүүлсэн. (Нэг хүний дундаж 128000 төг­рөг)

-Гар утасны төлбөр нь одоо, “Мобиком”-оос ирж бай­гаа. Нийт 250 мянган төгрөг (таван хүнийх-нэг хүний дундаж 50 000төгрөг)

3.Бензин шатахуун

а.Банкны машин ашиг­лаж байгаа

б. Нэг сард шатахууны зардал 900000 төгрөг гар­чээ. Нэг хүнд ноогдох дун­даж шатахууны зардал 180000 төгрөг.

4.Хөдөлмөр хамгаалал буюу жижиг зардал (Цай сахар, кофе, сүү)

а.101026 төгрөгийн зар­дал гаргасан байна. Нэг хүнд ноогдох дундаж зардал.

- 20000 төгрөг.

Эдгээр зардлыг нэгтгэн тооцоход зөвхөн ганц сард нийт 22890000 төгрөг гар­гасан байна. Тэднийг арван сар энэ цалин зардлыг гар­гасан гэвэл барагцаалахын аргагүй тоо гарах аж. Өөрөөр хэлбэл, сард нэг хүн дунджаар 4.578.000 төг­рө­гийн зардал гаргажээ. (Энэ бол шууд зардал харин шууд бус зардлыг тооцвол дээрх тоо талийж өгнө). Тухайлбал, бүрэн эрхт тө­лөөлөгчид “Анод” банкны машиныг унаж байгаа. Ма­шины зард­лын элэгдэл, сэлбэг хэ­рэгсэл, жолоочийн зардал, нарийн бичгүүд (дөр­­­вөн нарийн бичиг ажил­лаж бай­гаа), бусад бичиг хэрэгслийн зардал гээд тоочиж болно. Энэ маягаар өнөөдөр бүрэн эрхт тө­лөөлөгчид хийж бү­тээсэн гавьяагүй бусдын хөрөн­гөөр туйлж буй гэхэд болно. Эрх хүлээн авагчид ирвэл бас л нэлээд хөрөнгө тус банкнаас гарах нь тод­орхой.

“НОГООН МАЛГАЙТУУД” БА БҮРЭН ЭРХТ ТӨЛӨӨЛӨГЧИД

Дээрх жагсаалт бол тэд­ний зардлын өнгөцхөн хэ­сэг. Ингээд бодохоор тэд­ний гаргаж буй авир хэл­мэг­дүүлэлтийн үеийн “Ногоон малгайтнууд”-тай адилхан санагдана. “Ногоон мал­гайтнууд”-ын хувийн сэ­дэлтээс болж 1937 онд олон ч айл сүйрсэн түүх бий. Тэдний хүсэл тэчъяал, шуналаас болж сайхан эх­нэртэй бүхэн хэл­мэг­дүү­лэлтийн шуурганд өртөж байсан юм билээ. Эхнэр нь таалагдвал нөх­рийг нь хэл­мэгдүүлж бай­гаад эхнэрийг нь авч суудаг жишгийг тэд гаргаж байсан. Тэгвэл шинэ цагийн “Ногоон мал­гайт­нууд” буюу бүрэн эрхт тө­лөөлөгчид эрх биш эх­нэ­рийг нь биш үнэтэй маши­ныг нь хөлөглөн ган­гардаг болжээ.

ХУДЛАА ХЭЛСНИЙХ НЬ ТӨЛӨӨ “АНОД”-ЫНХОН С.НАСАНЖАРГАЛД ХАРИУЦЛАГА ТООЦОХ УЧИРТАЙ

Монголбанкны бүрэн эрхт төлөөлөгч С.На­сан­жаргал сард таван сая төг­рөгийн цалин авдаг гэдийг манай сонин мэдээлж бай­сан билээ. Үүний дараахан тэрбээр таван сая төгрөгийн цалин авдгаа үгүйсгэсэн ярилцлага өдөр тутмын нэгэн сонинд өгсөн байдаг. Тэрбээр хэлэхдээ “Би зар­дал мөнгийг аль болох хэмнэхийг зорьж байгаа. Үнэхээр таван сая төг­рөгийн цалин авдаг бол сайхан л байна” гэж худ­лаа хэлж байсан удаатай. Түү­нийг худлаа ярьсныг ил­чилсэн ярилцлагыг Мон­голбанкны тэргүүн дэд ерөн­­хийлөгч Б.Энххуяг өг­сөн. Тэрбээр хэлэхдээ “Бүрэн эрхт төлөөлөгчдийг ахлаж байгаа хүн таван сая төг­рөгийн цалин сард авдаг нь үнэн” гэж баталсан. Уг нь ард түмний өмнө худлаа хэлэх хэрэг төрийн албан хаагч хүнд байх ёс сур­тахуун мөн үү. Тавхан алхаад үнэнд баригдахаа бүрэн эрхт төлөөлөгч мэдэж л байсан баймаар. Төрийн албан хаагчид Мон­гол­банк­ны төлөөлөгч С.На­сан­жаргал шиг энэ мэт худлаа яриад явдаг юм биш биз гэсэн хардлага ард түмэнд байна. Ингэж хардах бол­сон шалтгаан нь Нийс­лэ­лийн автозамын газрын дарга асан Бат-Эрдэнэ ахын­хаа бичиг баримтыг ашиглан төр түмнээ хууран төрийн алба хашиж байсан. Төрийн нэр барьсан эдгээр худалчуудад авах арга хэм­жээ байдаг эсэхийг Төрийн албан хаагчдын зөвлөлийн гишүүн Д.Баатарсайханаас тодруулсан юм. Тэрбээр хэлэхдээ “Төрийн албан хаагчид худлаа хэлсэн яв­дал тэр болгон гардаггүй. Худлаа хэлсэн тохиолдолд төрийн албан хаагчийн ёс зүй зөрчсөн гэж үзээд Тө­рийн албан хаагчийн тухай хуулийн 15 дугаар зүйлийн дагуу арга хэмжээ авдаг. С.Насанжаргал худлаа ярь­сан бол “Анод”-ынхон түүн­тэй хариуцлага тооцох учир­­тай. Бид оролцох эрх­гүй. Учир нь “Анод” хувийн банк. Төр зөвхөн үйл ажил­лагаанд нь хяналт тавьж байгаа болохоос биш дотоод хэрэгт нь оролцох эрхгүй” гэсэн хариултыг өгсөн юм.

ТАВАН САЯ ТӨГРӨГИЙН ЦАЛИНТАЙ ХҮН МОНГОЛД ӨӨР БИЙ ЮҮ

Монгол Улсын Ерөн­хий­лөгч ч сард авдаггүй энэ цалинг өнөөдөр Мон­гол­банкны бүрэн эрхт тө­лөө­лөгчид ав­чихаад худлаа хэлэхээс өөр ажил хийхгүй байна. “Анод”-ыг өнөөдөр сэргээх нь бүү хэл, мөхөл рүү нь хөтөлж байгаа бүрэн эрхт төлөөлөгчид ард түм­нээс уучлалт гуйх хэрэг­тэй. Цалин болгож авсан таван сая төгрөгөө нэг бол шу­даргаад буцааж өг. Хэрэв өөрсдөө өгөхгүй бол худал хэлснийх нь төлөө ажлаас нь халж, “Анод”-ын олон сая төгрөгийг тэднээс гаргуулж, Авлигатай тэмцэх газарт шал­гуулъя. Тэд арван сар гаруй хугацаанд “Анод”-ыг сэргээх гэж оролдоод чад­сангүй. Мон­голбанкны удирд­лагууд ч тэдний ажилд сэтгэл дундуур байгаагаа илэрхийлж байсан. “Анод”-ын захирлууд 2.8 сая төгрөг сард авдаг байсан аж. Бү­тээн босгож байсан хүмүүс ийм бага мөнгө авч байхад банкийг сэргээх бус дам­пууруулж буй мэр­гэжилтэн таван сая төгрөг авна гэдэг байж болох асуудал гэж үү.